Analiza e Investimeve ushtrime – Prof. Dr. Hidajet Shehu, Dr. Albert Lusha, Dr. Belinda Xarba

Përshkrimi

Qëllimi kryesor i librit Analiza e investimeve – Ushtrime është formimi i shprehive praktike të studentëve për kryerjen e analizave mbi leverdishmërinë e investimeve që kryhen nga ana e ndërmarrjeve apo individëve, për evidentimin e problemeve në lidhje me administrimin e investimeve si dhe përvetësimin e mënyrës së interpretimit e të gjykimit të situatave të shqyrtuara, duke i këshilluar subjektet të kryejnë ose jo investime të caktuara, me objektiv kryesor maksimizimin e vlerës së tyre. Objektivi i tekstit është paraqitja në mënyrë sintetike dhe me terminologjinë e duhur e koncepteve kryesore dhe e instrumenteve më të rëndësishme duke respektuar në mënyrë rigoroze vijueshmërinë evolutive të realizuar në temën e vlerësimit të investimeve nga disiplinat shkencore mbi ndërmarrjen. Në libër paraqiten një seri ushtrimesh të zgjidhura që e analizojnë vlerësimin e investimeve në këndvështrime dhe aspekte të ndryshme. Nëpërmjet tyre pasqyrohet metodologjia, teknikat dhe fazat e vlerësimit, llogaritja dhe interpretimi i treguesve kryesorë të leverdishmërisë së investimeve etj. Libri përmban ushtrime në formën e testeve vetëvlerësuese, nëpërmjet të cilave studenti, apo çdo operator tjetër në fushën e analizës dhe kontrollit të investimeve, mund të verifikojë nivelin e njohurive të përfituara. Me qëllim që studentët të kryejnë punë të pavarur rëndësi u është kushtuar edhe ushtrimeve të pazgjidhura. Natyrisht që ushtrimet e përfshira në këtë libër mund të shfrytëzohen nga studentët si modele analize gjatë përgatitjes dhe mbrojtjes së temave të diplomave etj.