Dreri i trotuareve

Përshkrimi

Një histori brezash mes trysnisë së regjimit dhe dritës së shpirtit Ky është romani që theu shumë tabu në muzgun e letërsisë së realizmit socialist, duke shënuar një moment të ri estetik dhe duke krijuar bazat e një fryme të re letrare në Shqipëri. Dashuria, marrëdhëniet njerëzore, dhe tematikat e mbyllura deri atëherë vijnë në një formë që e pasionojnë lexuesin, duke e bërë misterioz raportin me veprën dhe duke e mbajtur librin aktual në çdo kohë. “Dreri i trotuareve” është historia e një brezi që kaloi në tunele të shumta historike: që nga trysnia më e egër e regjimit dhe ndjekja e Sigurimit në vitet ’70, e deri te periudha e gjatë e tranzicionit që ky brez mbajti mbi supe. Në këtë roman gjejmë grimca të vërteta të jetës së asaj kohe, paragjykimet dhe vuajtjet, por edhe rrezet e bukurisë shpirtërore që i ruajtën njerëzit të mos deformoheshin nga presioni i egër ideologjik. Autorja Diana Çuli shpjegon se “drerët” ishin të rinjtë gjimnazistë dhe studentët, të cilët endeshin rrugëve të qytetit dhe përpiqeshin të përballonin realitetin e zymtë. Ata ishin tamam si “dreri i ri”, të cilit pylli ende i pazbuluar i duket i mrekullueshëm, por që duhet të jetë i fortë për t’u ngritur mbi çdo pengesë. Dashuria, ëmbëlsia e jetës, gabimi, pendimi, kërkimi i identitetit dhe shpresa – gjithçka që na mundon e na shtyn të mendohemi gjatë, gjendet e skalitur në këtë libër.