Çelesi i letersise per shkollat e mesme

Përshkrimi

Përgatitja e duhur për suksesin në Maturën Shtetërore Me qëllim që të shmangni frikën e natyrshme që vjen nga emocionet e provimeve, duhet të kuptoni se nuk është aq e rëndësishme se cilat do të jenë fragmentet e zgjedhura për analiza e komente apo se cila do të jetë tema e esesë që do t’ju bjerë në provimin e Maturës Shtetërore. E rëndësishme është që të keni siguruar çelësin e njohurive bazë me të cilat jeni pajisur gjatë këtyre viteve të shkollës së mesme. Kështu, për shembull, nëse keni përvetësuar veçoritë që e bëjnë poemën “Çajld Harold” një vepër romantike apo heroin e saj një hero romantik, atëherë me këto njohuri ju mund të zbërtheni lehtësisht çdo lloj fragmenti të asaj vepre. Po kështu, ky libër ju ndihmon të rikujtoni njohuritë thelbësore gramatikore (nga morfologjia dhe sintaksa), nga fusha e leksikut dhe drejtshkrimi. Këto elemente do të jenë baza e një analize gjuhësore të saktë të çdo lloj teksti (letrar ose joletrar) si dhe treguesi kryesor i aftësive tuaja gjatë procesit të të shkruarit. Gjithashtu, manuali ju udhëzon të mësoni strukturat e llojeve të ndryshme të teksteve joletrare me qëllim që, mbi bazën e tyre, të ushtroheni për shkrimin e pavarur. Në shkrimin e esesë, për shembull, duhet të ushtroheni të zbuloni dhe të shkruani sa më tepër argumente pro dhe kundër tezave të caktuara, duke “shtrydhur” mirë trurin për të aftësuar logjikën. Ndërsa në një tekst përshkrues duhet të mprihni të vëzhguarin për ta parë objektin nga këndvështrime të ndryshme, për tekstin informues do të mësoni të mblidhni sa më shumë informacione dhe të dalloni thelbësoren nga ajo më pak e rëndësishmja.