Endacaku i yjeve

Përshkrimi

“Në toka të akullta, mbi gushë më ka rënduar qaforja e hekurt e robit; kam bërë dashuri me princesha dyersh të larta netëve të nxehta tropikale, teksa skllevërit na e lehtësonin zagushinë me erashka pendësh palloi, e nga larg, përtej palmave dhe shatërvanëve, ajrin e ngjeshur e shponin hungërimat e luanëve dhe klithmat e hienave. Jam kërrusur lugjeve të acarta të shkretëtirave e duart i kam ngrohur me zjarre të ndezura me bajga devesh; jam shtrirë nën hijen e mpakur të sherebelës së djegur nga dielli, pranë burimeve të shteruara, dhe gojëtharë jam lutur për ujë, i rrethuar me eshtra njerëzish e bishash që vdekja nga etja i kish marrë para meje. Kam qenë muço dhe cub, dijetar dhe eremit. Në prehjen e muzgjeve hijerënda kam përpirë vëllime të tëra me dorëshkrime të mbuluara nga myshku, në manastire të ngulura mbi shkëmbinj të thepisur, ndërkohë që poshtë në luginë, fshatarët nguteshin t’u jepnin fund punëve të ditës mes hardhive dhe ullinjve, e barinjtë cytnin drejt vathëve blegërimat e deleve dhe pëllitjet përtace të mëshqerrave; në qytete të lashta e të harruara u kam prirë turmave të tërbuara nëpër rrugë kalldrëmi të ngrënë e të brazduar nga rrotat e qerreve dhe koçive luftarake; dhe, me zë solemn e të rëndë si vdekja kam lexuar ligje, kam goditur shkeljet e rënda dhe kam shqiptuar dënime me vdekje për burra që ligjin kishin thyer, si Derëll Stending në burgun e Follsëmit.”