Gjëra që ngjasin

Përshkrimi

Romani “Gjëra që ngjasin” është një ironi dramatike për etjen mediatike perëndimore për histori “primitive”, përplasjen midis mitit dhe realitetit, duke na rrëfyer se si legjendat mund të shndërrohen në mall, të shfrytëzohen dhe të keqkuptohen. Një roman ku dëshirat vetjake ndërthuren me fantazitë kolektive, të fabrikuara nga perceptimi i jashtëm dhe ambicia e brendshme, atje ku ekzotizmi perëndimor ballafaqohet me oportunizmin lokal. Romani ndjek përpjekjen e një ekipi francez dokumentarësh për të zbuluar “kulturën misterioze të gjakmarrjes” në Shqipëri, duke na zbuluar një peizazh kompleks njerëzor, ku e vërteta dhe trillimi turbullohen dhe ku secili përpiqet të mbijetojë në mënyrën e vet. Klishetë vazhdojnë, miti mbijeton, jo përmes kodeve të lashta, por përmes oportunizmit modern dhe mbijetesës teatrale. Rrëfimi mbaron aty ku fillon, aty ku mitet e lashta inskenohen, shiten dhe konsumohen nga ata që kërkojnë shpëtim, famë, azil ose thjesht një jetë më të mirë. Një roman për brishtësinë e së vërtetës dhe të një vallëzimi tragjikomik midis traditës së vërtetë dhe identitetit të fabrikuar.