I humburi

Përshkrimi

Një anije drejt Italisë dhe një eksod i heshtur brenda qenies njerëzore Mars 1991. Thesar Lumi, banor në një nga qytezat pranë kryeqytetit, i hipën anijes në Durrës, bashkë me mijëra njerëz të tjerë, për t’u larguar me dëshpërim drejt Italisë. Por, në çastin e fundit, ai ndërron mendje dhe zbret. Me këtë skenë të fuqishme e domethënëse nis romani “I humburi” , i pari në ciklin e veprave të shkruara prej Fatos Kongolit në fillim të viteve ’90, i cili shënoi një sukses të jashtëzakonshëm brenda dhe jashtë vendit. Pse donte të ikte personazhi dhe përse zbriti pikërisht atëherë kur mundësia e lirisë ishte aq pranë? Në këtë libër janë fare të rralla fjalët që do të sugjeronin drejtpërsëdrejti kontekstin e ashpër politik apo natyrën e regjimit brenda të cilit çojnë jetën personazhet. Në vend të kësaj, autori arrin të vërë në pah, me mjete të holla letrare dhe psikologjike, atë që shquan botën e brendshme të protagonistëve të tij. I botuar për herë të parë para shumë vitesh, dhe i përkthyer me sukses në gjashtë gjuhë të huaja—ndër të cilat frëngjisht, gjermanisht dhe anglisht—ky rrëfim sjell një tablo të papërsëritshme dhe intime të jetës së përditshme në epokën e zymtë të diktaturës. Ai nuk është thjesht një tregim historik, por një eksod tronditës drejt kufijve të izolimit shpirtëror.