Në mendjen e hipnotizuesit

Përshkrimi

“Dëgjo vetëm zërin tim, asgjë tjetër. Së shpejti do të filloj numërimin mbrapsht… Ti do të hysh në shtëpi. Do ta shohësh. Dhe nuk do të kesh frikë…” Quhet Erik Maria Bark dhe është hipnotizuesi më i famshëm në Suedi. Atij i drejtohet policia sa herë që një dëshmitar është në gjendje tronditjeje të thellë dhe nuk arrin të flasë. Tani, një pacient ka nevojë për ndihmën e tij: Bjorni është i vetmi që di çfarë ka ndodhur vërtet në shtëpinë e vet, çfarë i ka ndodhur Suzanës, bashkëshortes, dhe cilat janë gjurmët që ai vetë, pa dashje, i ka zhdukur. Ai di gjithçka, por nuk arrin ta kujtojë. Dhe duhet ta kujtojë, sa më parë. Sepse Suzana është vetëm viktima e radhës e një vrasësi serial që po i shtie dridhmat Stokholmit, i cili së shpejti do të godasë sërish. Vrasësi vëzhgon, ndjek, filmon gjithçka dhe ia dërgon videon policisë, si një sfidë e hapur ndaj saj. Pastaj hyn në shtëpi, ndjek viktimat nga njëra dhomë në tjetrën dhe i vret. Ai është vetë vdekja, i bindur se është i pakapshëm. Askush tjetër veç Erikut nuk mundet të zbulojë, në thellësitë e mendjes së Bjornit, ndonjë gjurmë që ta ndalë këtë masakër. Por ajo që Eriku nuk e di, është se gjatë seancës së hipnozës do të dalin në dritë hollësi që lidhen me të. Hollësi nga e kaluara e tij. Hollësi komprometuese. Ajo që Eriku nuk e di është se i vetmi person të cilit i besonte – i vetmi detektiv i aftë për t’u përballur me këtë vrasës – nuk mundet ta ndihmojë më. Quhet Jona Lina dhe prej një viti është zhdukur. Autoritetet e kanë shpallur të vdekur. Dhe tani, hipnotizuesit i duhet të përballet i vetëm me tmerrin që fshihet në mendjen e vet.