Ngjitja – Stefan Hertmans

Përshkrimi

Vetë jeta e Stefan Hertmans-it [1951] është si një roman. Ai ka ushtruar profesionin e mësuesit, ka luajtur muzikë xhaz, është profesor, shkrimtar dhe laureat i Çmimit të Madh të Belgjikës për Letërsinë dhe është njëri nga shkrimtarët bashkë-kohorë më të rëndësishëm të Flandrës. Stefan Hertmans, [1951] poet, romancier, eseist, dramaturg, tregimtar dhe studiues arti. Është lector në Akademinë Mbretërore të Arteve të Bukura në Gent, Sorbonë, Vjenë dhe Berlin. Romani “Luftë dhe terpentinë”, ishte zgjedhur në listën e shkurtër për Çmimin Man Booker International. Vera e vitit 1979. Stefan Hertmans bleu një shtëpi të vjetër që kundërmon nga era e jargavanëve, pranë qendrës historike të Gentit, në lagjen Patershol. Njëzet vjet më pas, ai zbulon se kishte jetuar në shtëpinë Uillem Verhulstit, njërit prej nacionalistëve flamandë që ishte rrjeshtuar në radhët e SS-ve të ushtrisë naziste gjatë Luftës së Dytë Botërore. Duke ndjekur hap pas hapi qëmtimin e arkivës së kujtimeve, dokumentave zyrtare, fotografive, në mesin e ngjarjeve të trazuara të kohës, përveç historive të jetëve individuale, zbulojmë ekstremizmin nacionalist, veprimtarinë klandestine të luftës, turpin, pabesinë politike, dramën morale dhe tradhëtinë bashkëshortore të Verhulstit, i cili ishte personi përgjegjës për internimin e bashkëkombasve në kampet e përqëndrimit. Disa dekada më vonë, Adriani, djali i tij, një historian i njohur, nuk arrin të përballet dot me krimet e të atit. Por… sa realist dhe bindës mund të jetë një njeri, kur flitet për veprimtarinë e babait të tij? Ndërsa Evropa bën përpjekje që të ringrihet nga rrënojat e barbarisë duke shkundur hirin apokaliptik, Verhulst, edhe pse dënohet si një kriminel lufte, nuk shfaq asnjë lloj pendese për të shkuarën e tij. REVIEW “NGJITJA” ËSHTË NJË ROMAN INTRIGUES… DHE HERTMANS NJË ROMANCIER QË E BËN DETAJIN TË PAHARRUESHËM. THE TIMES