Nje udhetim reflektues me Politika si Ide

Përshkrimi

“Politika si ide”: A na mjaftojnë zgjedhjet dhe ligjet për të qenë një demokraci funksionale? Në librin “Politika si ide” , autorja Valentina Leskaj sjell një vështrim të thellë analitik mbi sfidat e shoqërive tona dhe mënyrën se si i qasemi zhvillimeve demokratike. Jo rrallë, vlerësimet tona ndikohen nga lodhja dhe zhgënjimi i shoqërive që dolën nga komunizmi dhe që kishin pritshmëri tejet të larta pas rënies së perdes së hekurt, duke e parë gabimisht demokracinë si një ngjarje të çastit dhe jo si një proces. Ndërkohë, krijimi i një kulture të vërtetë politike demokratike nuk është një moment i shkurtër, por një rrugëtim i gjatë dhe aspak i lehtë. Vitet e fundit, nga fjalori politik duket se janë fshirë parimet thelbësore të një demokracie funksionale, si përfshirja dhe meritokracia. Vetë koncepti i demokracisë funksionale përdoret rrallë, duke u marrë si e mirëqenë thjesht për shkak se ndryshoi sistemi politik, se bëhen zgjedhje, ekziston pluralizmi politik e mediatik dhe janë miratuar ligje garancie. Por shtrohet pyetja: A na mjafton kjo? Edhe pse vullneti politik, ligjet e mira dhe ngritja e institucioneve janë themele të rëndësishme, ato përbëjnë vetëm atë që Vaclav Havel e quan “demokraci teknike”. Ky libër i bën thirrje lexuesit të reflektojë mbi distancën mes fasadës institucionale dhe mungesës së substancës demokratike në përditshmëri.