Pesë leksione mbi psikoanalizën

Përshkrimi

Në 1909-ën, Universiteti i Klarkut në Uorçester, Masaçusets, kremtoi njëzetvjetorin e themelimit dhe rektori i tij, Dr. G. Stenli Holl, ftoi Frojdin dhe disa nga ithtarët e tij kryesorë (K. G. Jung, S. Ferenci, E. Xhons dhe A. A. Bril) të merrnin pjesë në këtë ngjarje, ku edhe do të nderoheshin me tituj. Frojdi e mori ftesën në dhjetor 1908, por u desh të vinte vjeshta e ardhshme që të celebrohej përvjetori; pesë ligjëratat e Frojdit u mbajtën nga dita e hënë, më 6 shtator, deri të premten e po asaj jave. Kjo, deklaroi vetë Frojdi në atë kohë, ishte njohja e parë zyrtare e shkencës së re dhe, siç e ka përshkruar në “Studimin Autobiografik” të tij, teksa hidhte hapat drejt katedrës, ku do të mbante leksionet, “dukej si realizimi i një ëndrre të pabesueshme me sy hapur”.