Porta e ngushtë e purgatorit

Përshkrimi

Saktësisht 35 vjet më parë, në vjeshtë të vitit 1989, Besnik Mustafaj botoi përmbledhjen me tregime dhe novela Vera pa kthim, duke lajmëruar lexuesin për vendin e rëndësishëm që do të kishte në veprën e tij letrare kjo gjini e prozës. “Porta e ngushtë e purgatorit” është libri i tretë me novela që ky shkrimtar ka botuar gjatë gjashtë viteve të fundit. Më parë ai na ka dhënë “Historia si një mushkë” (Toena) dhe “Fajtori” (Onufri). Novelat e Besnik Mustafajt mund të lexohen lirisht si romane të shkurtra, një format shkrimi ky veçanërisht i vështirë për t’u zotëruar, i lëvruar tashmë me mjeshtëri sidomos në letërsinë postmoderne, ku kanë spikatur autorë të mëdhenj botërorë, si Gabriel García Márquez apo sot Le Clézio, të dy fitues të çmimit “Nobel”. Por shkrimtari Besnik Mustafaj për veprën e tij letrare në këtë fushë ka parapëlqyer gjithnjë emërtimin klasik “novela”, duke e vendosur veten në vijën trashëgimtare të thesarit më të pasur novelistik të letërsisë shqiptare me Mitrush Kutelin dhe Ismail Kadarenë.