Vizitorja e pasqyrës 1 – Të fejuarit e dimrit

Përshkrimi

Të fejuarit e dimrit është vëllimi i parë i një sage emocionuese, që po pushton zemrat e mijëra lexuesve të rinj e të rritur dhe po bëhet një fenomen kulti mbarëbotëror. Në një univers të përbërë nga njëzet e një arka, ishuj qiellorë pluskues, jeton Ofelia, një vajzë e ndrojtur, e ngathët dhe pak dritëshkurtër, por me dy dhunti të veçanta: aftësinë për të lexuar shpirtrat e objekteve dhe për të udhëtuar mes përmes pasqyrave. Ajo punon si kuratore e një muzeu derisa Plakat e qytetit vendosin ta martojnë me Tornin fisnik, nga familja e fuqishme e Dragoit, një burrë enigmatik. Kjo do të thotë që ajo është e detyruar të largohet nga Arka e saj, “Anima”, drejt një arke shumë më të ftohtë dhe jomikpritëse të quajtur “Poli”, e banuar nga familje që janë gjithmonë në luftë me njëra-tjetrën. Ofelia lë familjen për të ndjekur të fejuarin në kryeqytetin pluskues, në Qytetqiell. Pse kanë zgjedhur pikërisht atë? Edhe pse nuk e di ende, ajo është bërë pengu i një komploti vdekjeprurës. Të fejuarit e dimrit është pa dyshim një libër shumë interesant, me përshkrime vendesh e atmosferash ndër më të bukurat dhe më të gjallat, me një lojë iluzionesh të vazhdueshme, me një dramë që të magjeps, shumë dinamike, plot kthesa dhe intriga. Herë pas here libri të kujton Lizën në botën e çudirave dhe letërsinë e fantazisë për të rinj, nga Harry Potteri e deri te Muzgu. “Po aq magjepsës sa një ëndërr e bukur me sy hapur, libri Të fejuarit e dimrit do t’ju fusë në grackën e botës së vet unike, marramendëse, magjike, të tradhtisë, të iluzioneve dhe intrigave.” Kirkus Reviews “Të fejuarit e dimrit është një libër tjetër i shkëlqyer në gjininë e fantazisë, që librarët mund t’ua rekomandojnë të rriturve dhe adoleshentëve. Bota në këtë libër është e jashtëzakonshme, kurse Ofelia një heroinë me të cilën mund të identifikoheni menjëherë: e zgjuar, e shkathët dhe vazhdimisht e nënvlerësuar. Dabosi i emocionon lexuesit, teksa Ofelia gjendet në një kurth të lemerishëm: mes intrigave politike dhe sekreteve vdekjeprurëse, me asnjë armë tjetër për ta mbajtur gjallë, përveç zgjuarsisë së saj. Tensioni rritet dhe misteret zbulohen dhe ju do ta keni të pamundur ta braktisni librin.” Bookshop West Portal, San Francisco, CA