Hana vajza qe kapi diellin

Description

Shkrimtarja e njohur për fëmijë, Rovena Rrozhani ka sjellë librin më të ri me një përrallë që evokon folklorin të shkrirë në një përrallë moderne. Historia e Hanës është sjellë në ilustrimet e bukura të piktores Mirjana Madhi e cila ka zbërthyer në piktura fatin e vajzës së pasqyrabërësit të cilës i bie detyra e vështirë për të shpëtuar fshatin e saj nga errësira dhe mjerimi. Kjo përrallë me të papritura i mëson fëmijëve nuk është forca fizike që zgjidh sfidat, por vetëbesimi dhe zgjuarsia. “Hana, është vajza me Hënën dhe me Diellin brenda saj, guximin dhe kreativitetin, besimin dhe vendosmërinë, forcën dhe ndjeshmërinë. Hana është çdo vajzë që rritet me besimin se gjinia nuk është kurrë pengesë për të arritur gjëra të mëdha dhe për të jetuar e lirë. Çdo fëmijë, që rritet i lirë nga kufizimet gjinore, me dashuri të pakushtëzuar dhe besim, mund të zbulojë diellin brenda vetes, ta ushqejë dhe ta rrisë atë duke ndriçuar rrugën e vet dhe të gjithë botën.”-Blerta Bodinaku, psikologe klinike, psikoterapiste “Rovena Rrozhani me stilin e butë e të rrjedhshëm sjell në përrallë një profil modern, duke trajtuar tematika aktuale, pa ia hequr rrëfimit formën klasike dhe tradicionale. Sfidat, forca e grave, guximi apo ndjenja e drejtësisë, janë disa nga argumentet kryesore të kësaj përralle, e cila tërheq, magjeps e zbavit dhe mbetet njëkohësisht një mjet i jashtëzakonshëm mësimi. Rrëfimi i saj përcjell mesazhe të rëndësishme mbi jetën dhe gjithashtu një dozë të mirë motivimi.”-Anna Lattanzi, Kryeredaktore e “Albania Letteraria”