Leter Dylqinjes

Description

Ky libër vjen si një reflektim 25 vjeçar i leximeve të kryeveprave të letërsisë botërore, nga një lexues jo dosido; i ngjashëm me zhanrin eseistik. Këtu personazhet letrare jetësohen në përditshmëri, ndërsa veprat letrare futen natyrshëm në botën tonë përmes një ndërmjetësimi të spikatur prej studiuesi dhe lexuesi plot shije si Agim Baçi. Eshtë një këndvështrim origjinal, ku janë përshkruar 18 letra dhe 18 përgjigje, që autori ka tentuar t’i përshtasë me stilet që autorët kanë sjellë veprat e tyre. E nëse letrat janë të gjitha të nënshkruara nga autori i këtij libri, përgjigjet janë “firmosur” herë nga personazhet e herë nga autorët. Libri i Agim Baçit, njohur si gazetar, kritik por dhe si tregimtar e novelist, vjen me 18 letra drejtuar personazheve të përbotshme të letërsisë, si Don Kishotit, Shvejkut, Çiçikovit, Ana Kareninës, Madamë Bovarisë, Odiseut, Tom Sojerit, Brutit apo edhe autorëve si Cvajg dhe Milan Kundera Letrat drejtuar personazheve dhe autorëve të përbotshëm janë një ide origjinale në dhënien e këndvështrimeve të leximeve. Por padyshim që mund të lexohen edhe si letërsi e, herë-herë, edhe si esse. Lexuesi ftohet të ketë lupën e tij të leximit për personazhe që kanë zënë vend në miliona biblioteka në botë, në qindra vite. Personazhet dhe autorët të cilëve iu është “drejtuar” Baçi, vijnë nën ilustrimet e Bujar Kapexhiut, duke i dhënë librit një dimension sa imagjinar në lexim, ashtu edhe në përshkrim.