Maja dhe Natasha

Description

Dy motra, një ëndërr e vetme dhe një tradhti që ndryshon gjithçka Maja dhe Natasha janë motra binjake të lindura gjatë rrethimit të ashpër të Leningradit në vitin 1941. Nëna e tyre, balerina e parë e trupës së Baletit Kirov, e rënduar psikologjikisht nga lufta dhe humbja e mundësisë për të shkëlqyer në skenë, i jep fund jetës fill pas lindjes. Të rritura nga shoqja e ngushtë e nënës së tyre, vajzat trashëgojnë të njëjtin talent të jashtëzakonshëm. Për to, Akademia e Baletit Vaganova dhe regjimi totalitar sovjetik janë e vetmja botë që njohin. Në vitin 1958, në kulmin e Luftës së Ftohtë, ëndrra e tyre më e madhe është të kërcejnë me trupën Kirov në një turne historik në Amerikë. Por një ligj i hekurt i Kremlinit ua përmbys të ardhmen: anëtarët e së njëjtës familje nuk lejohen të udhëtojnë bashkë jashtë vendit nga frika e arratisjeve. Kështu, në trupën e famshme mund të pranohet vetëm njëra prej tyre. Maja, e mësuar prej kohësh të jetojë në hijen e motrës, e pranon me hidhërim fatin, derisa një partner i ri kërcimi i zgjon ëndrrat e fjetura. Për herë të parë, motrat janë të barabarta në garë. Dhe pikërisht atëherë, njëra tradhton tjetrën. Jetët e tyre ndahen në dy drejtime të kundërta. Njëra ndjek karrierën në Amerikë, duke shijuar lirinë jashtë territorit të Rusisë, ndërsa tjetra përzgjidhet për të interpretuar në përshtatjen e filmit epik “Lufta dhe paqja”, financuar nga regjimi sovjetik. Kur Lufta e Ftohtë ashpërsohet, ato përballen me hijet e së kaluarës, besnikërinë ndaj vendit, pendesat dhe thirrjen e pandalshme të gjakut. Korniza e baletit dhe përplasja e dy superfuqive për epërsi kulturore e bëjnë këtë libër një dëshmi të fuqishme. Siç thekson dhe kritika nga Critical Dance , ky roman nuk u drejtohet vetëm adhuruesve të këtij arti; gjithkush mund ta gjejë veten thellësisht në historinë e Majës dhe Natashës, sidomos ata që e kuptojnë peshën e jetesës nën regjimet totalitare.