Mardhëniet Tokë-Ujë -Besnik Gjongecaj, Avdullah Nishori

Description

Kjo monografi tenton të paraqesë sa më qartë që është e mundur bazën teorike të marrëdhënieve midis tokës dhe ujit dhe se si kjo teori, një nga më të komplikuarat në fushën e fizikës së tokës, u aplikua eksperimentalisht në disa tipe kryesorë grimcametrik tokash në Kosovë. Është studimi i parë eksperimental që bëhet në Kosovë në këtë fushë dhe ka një synim aplikativ të dallueshëm qartë: të përcaktojë kapacitetin ujëmbajtës të tokave të Kosovës dhe mbi këtë bazë, të përcaktojë edhe kontributin që japin ato në plotësimin e nevojave për ujë të bimëve në kuadrin e bilancit ujor. Nga pikpamja shkencore, libri i paraqitur tenton të zbulojë se sa e përshtatshme është metoda eksperimentale e aplikuar, se sa rezultatet e saj përputhen me teorinë dhe me punën eksperimentale të kryer ndër vite nga themeluesit e kësaj fushe studimi në botë. Ky libër është shkruar me një vijueshmëri logjike, pa boshllëqe në mes, në një rrugë që hap pas hapi i jep përgjigje disa çështjeve të rëndësishme teorike në fushën e marrëdhënieve të tokës me ujin, çka e bën atë të fitojë edhe një dimension tjetër, vlerën e përdorimit të tij si një tekst universitar, veçanërisht në fushën e ujitjes, por edhe në ndihmë të lëndëve të fizikës së tokës dhe të shkencës së tokës. Në fund, ky libër dhe studimi që i bashkëngjitet atij, është fillimi i një rruge të re në fushën e studimeve të çështjeve ujore në Kosovë, veçanërisht atyre që lidhen me vlersimin e pasurisë ujore që ka Kosova dhe se çâ€pjesë të kësaj pasurie duhet ta vendosë në dispozicion të zhvillimit bujqsor. Prandaj, meqënëse merret me studimin e një prej pasurive më të mëdha që ka një shtet, ky libër është në përputhje të plotë me detyrën modeste për të kontribuar në procesin e konsolidimit dhe fuqizimit të shtetit të ri demokratik të Kosovës.