Misteri i mjellmes

Description

Një dedektiv në kërkim të së vërtetës mes korrupsionit dhe një hijeje enigmatike Nevil Bardhi, protagonisti i këtij romani të ri të Kongolit, është një inspektor në Drejtorinë e Përgjithshme të Krimeve të Rënda (DPKR). Megjithëse punon në mesin e krimeve reale, ëndrra e tij e madhe mbetet ajo e gjimnazit: të bëhet një dedektiv privat si idhulli i tij legjendar, Hercule Poirot. Rutina e tij trazohet befas një ditë kur një e panjohur enigmatike, të cilën ai e pagëzon me emrin Mjellma, i dërgon një zarf me fakte tronditëse. Kështu nis një marrëdhënie e çuditshme dhe e rrezikshme midis inspektorit dhe Mjellmës—një qenie sa reale, aq edhe virtuale. Kush është ajo dhe çfarë synimesh ndjek duke i vënë në dispozicion dokumente konfidenciale që mund të shkaktojnë “tërmete” në sferat më të larta të pushtetit? Në kërkim të zbulimit të identitetit të saj, Nevil Bardhi në të vërtetë arrin të zbulojë vetveten në një realitet të zhytur në korrupsion, ku krimi i organizuar dikton ligjin. I tunduar nga joshja e Mjellmës, por i përpirë nga dashuria për Gentën, Nevili gjendet para një sfide morale. Siç e paralajmëron vetë Mjellma në letrat e saj: “Është koha të shpëtoni shpirtin tuaj, ndryshe mund të jetë vonë. Ju jeni vënë në shërbim të Mafies pa e kuptuar. Përpiquni t’i ngjani sadopak idhullit tuaj Hercule Poirot.” “Misteri i mjellmes” është një radiografi e dhimbshme e shoqërisë shqiptare, ku e vërteta është gjithmonë e rrethuar nga mjegulla.