MIZAT

Description

Një njeri ecën vazhdimisht duke qenë i bezdisur nga zukamat e mizave, të cilat askush nuk i sheh deri në njëfarë pike. Ekzistojnë vërtet ato, apo janë pjellë e imagjinatës së tij të shfytyruar? Po sikur kjo imagjinatë të përcillet deri tek të tjerë? Një Odise kthehet në Itakën e tij, i zhvendosur në një tjetër plan kohor jo larg të sotmes, duke na thënë se në fakt Odisetë janë të përhershëm, kthimet e tij rutina e bashkëkohësisë dhe ideja e kthimit një domosdoshmëri sociale. Një qytet zgjohet një ditë pa xhelatin e tij, ndërkohë që tirani absolut jep urdhër që ky të gjendet. Një burrë nis kërkimin e xhelatit në këmbim të një shpërblimi të majmë, derisa gjasat janë t’ia zërë vendin e të shndërrohet në xhelatin e ri, çka është po aq mishërim i xhelatit brenda tij: një rrugëtim i cili dështon nga mungesa e shkathtësisë, por që na zbulon se çdokush tjetër dëshiron të jetë një xhelat. Ashtu si tek vëllimi “Minotauri”, edhe tregimet e këtij vëllimi pasqyrojnë gjendjen njerëzore dhe reagimin përballë situatave të zakonshme e të pazakonta, si dhe dyshimin mbi vetveten. “Mizat” është pjesa e dytë e një serie me nëntitullin Tregimet më të shkurtra në botë, të cilat do të jenë të ndara në disa vëllime.