Selfie: Uni i unit

Description

Si u bëmë kaq të marrosur pas vetes dhe çfarë trajte po marrim Në këtë histori interesante psikologjike dhe shoqërore, Storr u përgjigjet pyetjeve: Nga krijohet ideja e “vetvetes së përsosur”? Pse është kaq ndikuese te ne kjo ide? A ka ndonjë mënyrë për të thyer magjinë e saj? Për këtë ai mbështetet në literaturën shkencore dhe interviston ekspertë lidhur me çështje të personalitetit njerëzor. Ai përmbledh me mjeshtri qëndrime dhe besime të “mendimit perëndimor”, nga Aristoteli, Kalvini, Frojdi, Sartri, Randi dhe Xhobsi. Selfie: Uni i unit është një analizë e “vetvetes moderne”, shumë ndihmues për të gjithë ata që janë të fiksuar në veçantinë e vet. Është një histori e vetvetes që nga kohërat më të hershme (kur jemi përpjekur të rrisim statusin tonë brenda fisit) deri te vetja jonë e tanishme (e uritur për risitë teknologjike). Një gjë është e sigurt: problemet që ne reflektojmë në personalitetin tonë nuk lidhen me zhvillimin e teknologjisë. Ato lidhen me qytetërimin që ne kemi ndërtuar, një kulturë që për shumë dekada ka inkurajuar te ne nivele të larta përsosmërie. Problemet shkaktohen nga vetë NE. Will Storr është një gazetar dhe novelist i njohur. Shkrimet e tij janë publikuar në medie të shumta, si: Guardian Weekend, revistën The Times, revistën Observer, GQ, Marie Claire dhe Sydney Morning Herald. Storr ka fituar çmimin National Press Club për mënyrën e shkëlqyer dhe të përpiktë të të shkruarit. Në vitin 2012 iu dha çmimi One World Press dhe Amnesty International. Në vitin 2013, seritë e An Unspeakable Act të përgatitura prej tij e që transmetoheshin rregullisht në radion BBC, fituan çmimin AIB.